డల్లాస్లోని మెక్కిన్నీలో శ్రీకృష్ణ జన్మాష్టమి వేడుకలు భక్తిశ్రద్ధల మధ్య వైభవంగా జరిగాయి. కృష్ణ హెరిటేజ్ సెంటర్ ఆధ్వర్యంలో నిర్వహించిన ఈ ఆధ్యాత్మిక వేడుకలకు భక్తులు కుటుంబ సమేతంగా పెద్ద సంఖ్యలో హాజరై శ్రీకృష్ణుడి దివ్య అవతరణను భక్తితో స్మరించుకున్నారు.
సెప్టెంబర్ 4న సాయంత్రం ప్రారంభమైన వేడుకల్లో జప ధ్యానం, కీర్తనలు, ప్రత్యేక పూజలు భక్తులను ఆధ్యాత్మిక అనుభూతిలో ముంచెత్తాయి. గోపాలుడికి అభిషేకం, అర్చన, 108 ప్రత్యేక సమర్పణలు, పల్లకి సేవ, ఝూలన్, గోపూజ వంటి కార్యక్రమాలు ప్రత్యేక ఆకర్షణగా నిలిచాయి.
చిన్నారులను ఆకట్టుకునేలా ఏర్పాటు చేసిన కిడ్స్ మేళాలో ప్రత్యేక ఆటలు, వినోద కార్యక్రమాలు నిర్వహించారు. పిల్లలు ఉత్సాహంగా పాల్గొనడంతో ప్రాంగణంలో సందడి నెలకొంది. భక్తులందరికీ ఉచిత ప్రసాదాన్ని అందించారు.
వేడుకల్లో అత్యంత భక్తిభావాన్ని నింపిన ఘట్టంగా అర్ధరాత్రి హారతి నిలిచింది. శ్రీకృష్ణుడి జన్మ వేళ ప్రత్యేక హారతితో కృష్ణ హెరిటేజ్ సెంటర్ ఆధ్యాత్మిక శోభతో కళకళలాడింది. భక్తులు భక్తిపారవశ్యంలో కృష్ణ నామస్మరణ చేస్తూ వేడుకలను ఘనంగా ముగించారు.
“ప్రేమ, భక్తి, ఆనందంతో లిటిల్ కృష్ణుడిని స్వాగతిద్దాం” అనే సందేశంతో నిర్వహించిన ఈ జన్మాష్టమి వేడుకలు భక్తులకు మధురమైన ఆధ్యాత్మిక అనుభూతిని అందించాయి. సంప్రదాయ ఆధ్యాత్మిక కార్యక్రమాలతో పాటు పిల్లలు, కుటుంబ సభ్యుల కోసం ప్రత్యేక కార్యక్రమాలను నిర్వహించడం వేడుకలకు మరింత ప్రత్యేకతను తీసుకొచ్చింది.
