అమెరికాలోని మిచిగన్ రాష్ట్రంలో ఇండియన్ ఓవర్సీస్ కాంగ్రెస్ యూఎస్ఏ (IOC USA) మిచిగన్ చాప్టర్ ఘనంగా ప్రారంభమైంది. ఈ సందర్భంగా నిర్వహించిన “మీట్ అండ్ గ్రీట్” కార్యక్రమానికి ప్రవాస భారతీయుల నుంచి విశేష స్పందన లభించింది.
ఈ కార్యక్రమానికి ఇండియన్ ఓవర్సీస్ కాంగ్రెస్ యూఎస్ఏ అధ్యక్షుడు మొహిందర్ సింగ్ గిల్జియన్, తెలంగాణ టూరిజం కార్పొరేషన్ ఛైర్మన్ పటేల్ రమేష్ రెడ్డి ముఖ్య అతిథులుగా హాజరయ్యారు. కార్యక్రమంలో ప్రవాస భారతీయులతో ఆత్మీయంగా సమావేశమైన వారు, భారతదేశ అభివృద్ధిలో ప్రవాస భారతీయుల పాత్ర, తెలంగాణ పర్యాటక రంగ ప్రోత్సాహం, భారతీయ సమాజ ఐక్యత, విదేశాల్లో భారతీయుల సేవల ప్రాధాన్యత వంటి కీలక అంశాలపై తమ అభిప్రాయాలను పంచుకున్నారు.
మిచిగన్ ప్రాంతానికి చెందిన పలువురు ప్రవాస భారతీయులు, వివిధ భారతీయ సంఘాల ప్రతినిధులు, సామాజిక కార్యకర్తలు కార్యక్రమంలో పాల్గొని ముఖ్య అతిథులకు ఘన స్వాగతం పలికారు. పరస్పర పరిచయాలు, అభిప్రాయాల మార్పిడి, భవిష్యత్ కార్యాచరణపై స్నేహపూర్వకంగా చర్చలు నిర్వహించారు.
ప్రవాస భారతీయులను ఒకే వేదికపైకి తీసుకువచ్చి, భారతీయ సంస్కృతి, సామాజిక ఐక్యత, పరస్పర సహకారాన్ని మరింత బలోపేతం చేయాలనే లక్ష్యంతో నిర్వహించిన ఈ “మీట్ అండ్ గ్రీట్” కార్యక్రమం విజయవంతంగా ముగిసింది. మిచిగన్లో ఇండియన్ ఓవర్సీస్ కాంగ్రెస్ యూఎస్ఏ కార్యకలాపాలకు ఇది నూతన అధ్యాయానికి నాంది పలికిందని నిర్వాహకులు పేర్కొన్నారు.
