న్యూఢిల్లీలోని ఇందిరా గాంధీ అంతర్జాతీయ (IGI) విమానాశ్రయంలో కస్టమ్స్ అధికారులు భారీ బంగారం స్మగ్లింగ్ను అడ్డుకున్నారు. ఇంటెలిజెన్స్ సమాచారం, ప్రయాణికుల ప్రొఫైలింగ్ ఆధారంగా జెడ్డా నుంచి ముంబై మీదుగా ఢిల్లీకి ఇండిగో 6E-6133 విమానంలో వచ్చిన ఓ ప్రయాణికుడిని టెర్మినల్-1 వద్ద తనిఖీ చేశారు.
ప్రయాణికుడు ఇంటి సామానుతో పాటు చెక్-ఇన్ లగేజీలో ఒక ఎలక్ట్రిక్ స్కూటర్ను తీసుకొచ్చాడు. హ్యాండ్ బ్యాగేజీ, చెక్-ఇన్ లగేజీని ఎక్స్రే స్కాన్ చేయగా అనుమానాస్పద చిత్రాలు కనిపించాయి. డోర్ ఫ్రేమ్ మెటల్ డిటెక్టర్ (DFMD)లో ఎలాంటి అలారం మోగకపోయినా అధికారులు స్కూటర్ను క్షుణ్ణంగా పరిశీలించారు.
పరిశీలనలో స్కూటర్ టైర్ల ఘన భాగంలో అత్యంత చాకచక్యంగా దాచిన 24 క్యారెట్ల బంగారానికి చెందిన 19 కట్ పీసులు బయటపడ్డాయి. వీటి మొత్తం నికర బరువు 869.5 గ్రాములుగా అధికారులు గుర్తించారు.
స్వాధీనం చేసుకున్న బంగారాన్ని కస్టమ్స్ అధికారులు జప్తు చేసి, ప్రయాణికుడిపై బంగారం స్మగ్లింగ్ కేసు నమోదు చేశారు. ఈ ఘటనపై మరింత దర్యాప్తు కొనసాగుతోంది.
