పనామా జెండాతో ప్రయాణిస్తున్న ‘ఎంవీ ఓషన్ విన్నర్’ కార్గో నౌక బంగాళాఖాతంలో మునిగిపోయింది. ఒడిశాలోని పారాదీప్ తీరానికి సుమారు 240 నాటికల్ మైళ్ల దూరంలో శనివారం ఈ ఘటన చోటుచేసుకుంది. సమాచారం అందుకున్న భారత కోస్ట్ గార్డ్, నేవీ సంయుక్తంగా భారీ సహాయక చర్యలు చేపట్టాయి.
ఈ నౌకలో మొత్తం 24 మంది సిబ్బంది ఉన్నారు. వారిలో 20 మంది చైనా, ముగ్గురు మయన్మార్, ఒకరు బంగ్లాదేశ్కు చెందినవారిగా అధికారులు తెలిపారు. ఒడిశా నుంచి ఇనుప ఖనిజాన్ని సింగపూర్కు తరలిస్తుండగా నౌక ప్రమాదానికి గురైంది.
రెండు లైఫ్ రాఫ్టుల్లో సిబ్బంది గుర్తింపు
నౌకతో సంబంధాలు తెగిపోయినట్లు సమాచారం అందిన వెంటనే భారత కోస్ట్ గార్డ్, నేవీ రంగంలోకి దిగాయి. గాలింపు చర్యల్లో భాగంగా రెండు లైఫ్ రాఫ్టుల్లో ఉన్న ఇద్దరు సిబ్బందిని రక్షించినట్లు అధికారులు తెలిపారు.
మిగిలిన సిబ్బంది కోసం సముద్రంలో విస్తృతంగా గాలింపు కొనసాగుతోంది. ప్రమాద ప్రాంతానికి సమీపంలో ఉన్న ఇతర నౌకలకు కూడా సమాచారం అందించి, సహాయక చర్యల్లో పాల్గొనాలని కోరారు.
ఆగస్టు 20న పారాదీప్ నుంచి బయలుదేరిన నౌక
‘ఎంవీ ఓషన్ విన్నర్’ ఆగస్టు 20న పారాదీప్ పోర్టు నుంచి బయలుదేరినట్లు అధికారులు తెలిపారు. నౌకలో ఒడిశా నుంచి లోడ్ చేసిన ఇనుప ఖనిజం ఉన్నట్లు సమాచారం.
ఆగస్టు 22న నౌకతో కమ్యూనికేషన్ తెగిపోవడంతో అధికారులు అప్రమత్తమయ్యారు. అనంతరం నౌక ప్రమాదంలో చిక్కుకున్నట్లు గుర్తించి సహాయక చర్యలు ప్రారంభించారు.
నౌక ఎందుకు మునిగిందో తెలియదు
నౌక మునిగిపోవడానికి కచ్చితమైన కారణం ఇంకా తెలియరాలేదు. కమ్యూనికేషన్ తెగిపోవడానికి ముందు నౌకలో ఏం జరిగింది, సముద్ర పరిస్థితులు ఎలా ఉన్నాయి, ప్రమాదానికి దారితీసిన ఇతర కారణాలేమైనా ఉన్నాయా అనే అంశాలపై అధికారులు వివరాలు సేకరిస్తున్నారు.
భారత కోస్ట్ గార్డ్, నేవీ సిబ్బంది మిగిలిన 22 మంది కోసం గాలింపు చర్యలను ముమ్మరం చేశారు.
