అమెరికా అధ్యక్షుడు డొనాల్డ్ ట్రంప్కు అమెరికా సుప్రీంకోర్టులో ఎదురుదెబ్బ తగిలింది. రచయిత ఈ. జీన్ క్యారోల్ దాఖలు చేసిన లైంగిక దుర్వినియోగం, పరువునష్టం సివిల్ కేసులో 5 మిలియన్ డాలర్ల పరిహారం చెల్లించాలని జ్యూరీ ఇచ్చిన తీర్పును సవాల్ చేస్తూ ట్రంప్ దాఖలు చేసిన అప్పీల్ను సుప్రీంకోర్టు స్వీకరించలేదు.
దీంతో దిగువ కోర్టు, అప్పీల్స్ కోర్టు ఇచ్చిన తీర్పులు యథాతథంగా కొనసాగనున్నాయి. సుప్రీంకోర్టు ఈ అప్పీల్ను తిరస్కరించినప్పటికీ, ఇందుకు సంబంధించి ఎలాంటి వివరణాత్మక కారణాలను వెల్లడించలేదు. ఇలాంటి సందర్భాల్లో కోర్టు కారణాలు వెల్లడించకపోవడం సాధారణ ప్రక్రియగా పరిగణిస్తారు.
ఈ కేసు 2023లో జరిగిన సివిల్ విచారణకు సంబంధించినది. ఆ విచారణలో జ్యూరీ, ట్రంప్ ఈ. జీన్ క్యారోల్పై లైంగిక దుర్వినియోగానికి పాల్పడ్డారని, అనంతరం ఆమెపై చేసిన వ్యాఖ్యలతో పరువునష్టం కలిగించారని నిర్ధారించింది. ఈ నేపథ్యంలో క్యారోల్కు 5 మిలియన్ డాలర్ల పరిహారం చెల్లించాలని ఆదేశించింది.
అయితే ట్రంప్ మాత్రం ఈ ఆరోపణలను మొదటి నుంచి ఖండిస్తున్నారు. విచారణలో కొన్ని ఆధారాలను అనుమతించడం వల్ల జ్యూరీపై ప్రభావం పడిందని, అందుకే తీర్పును రద్దు చేయాలని ఆయన న్యాయవాదులు సుప్రీంకోర్టును ఆశ్రయించారు.
సుప్రీంకోర్టు అప్పీల్ను తిరస్కరించడంతో ఈ కేసులో ట్రంప్కు న్యాయపరంగా మరో ఎదురుదెబ్బ తగిలినట్లైంది. ఇదే సమయంలో ఈ. జీన్ క్యారోల్కు సంబంధించిన మరో పరువునష్టం కేసుపై న్యాయపరమైన ప్రక్రియలు వేరుగా కొనసాగుతున్నాయి.
