భారతీయ సినీ పరిశ్రమలో విలక్షణ నటుడిగా గుర్తింపు పొందిన ప్రదీప్ రావత్ ఇకలేరు. 74 ఏళ్ల వయసులో ఆయన కన్నుమూశారు. కొన్నేళ్ల క్రితం రక్త క్యాన్సర్కు చికిత్స తీసుకుని కోలుకున్న ఆయనకు సుమారు ఆరు వారాల క్రితం వ్యాధి మళ్లీ రావడంతో ఆరోగ్యం క్షీణించింది. అనంతరం ముంబైలోని ఆసుపత్రిలో చికిత్స పొందుతూ తుదిశ్వాస విడిచారు.
టెలివిజన్లో బి.ఆర్. చోప్రా రూపొందించిన 'మహాభారత్' సీరియల్లో అశ్వత్థామ పాత్ర ద్వారా ఆయనకు విశేష గుర్తింపు లభించింది. ఆ తర్వాత హిందీతో పాటు తెలుగు, తమిళ, కన్నడ, మలయాళ భాషల్లో వందలాది చిత్రాల్లో నటించి తనదైన ముద్ర వేశారు.
తెలుగు ప్రేక్షకులకు 'సై', 'ఛత్రపతి', 'దేశముదురు', 'సరైనోడు', 'వాల్తేరు వీరయ్య' వంటి చిత్రాల్లో విలన్ పాత్రలతో ఎంతో దగ్గరయ్యారు. అలాగే హిందీలో 'లగాన్', 'సర్ఫరోష్', 'ఘజినీ' వంటి చిత్రాల్లో ఆయన నటనకు ప్రశంసలు దక్కాయి.
దాదాపు నాలుగు దశాబ్దాల సినీ ప్రస్థానంలో శక్తివంతమైన ప్రతినాయక పాత్రలు, గంభీరమైన వ్యక్తిత్వం, అద్భుతమైన నటనతో ప్రేక్షకుల మన్ననలు పొందారు. ఆయన మరణ వార్త తెలిసిన వెంటనే సినీ ప్రముఖులు, దర్శకులు, అభిమానులు సోషల్ మీడియాలో సంతాపం వ్యక్తం చేస్తున్నారు.
ప్రదీప్ రావత్ మరణంతో భారతీయ సినీ పరిశ్రమ ఓ విలక్షణ నటుడిని కోల్పోయిందని సినీ వర్గాలు పేర్కొంటున్నాయి. ఆయన పోషించిన పాత్రలు, అందించిన అద్భుతమైన నటన ప్రేక్షకుల హృదయాల్లో చిరస్థాయిగా నిలిచిపోతాయి.
